الطريق الى المصيف

الطريق إلى المصيف

فضلت قاعد تحت كوبري استانلي مستني الفرج .. ونفسيتي زي الزفت بعد ما ألقيت خطاب التنحي الأخير .. وأعلنت اعتزالي الكتابة في الموقع .. لأن دماغي للأسف خذلتني ..وبقت عاملة زي الكوز المخروم.. وأمي ربنا يسامحها لما بيضت البيت والحيطة بقت طرية وملقتش حاجة أخبط فيها راسي عشان أكتب لكم ..الدنيا أشودت في ورري .. لامؤخذة قصدي ..أسودت في وشي .. سامحوني مش بقولوكم دماغي بقت عاملة زي القفل المصدي ..ونسيت الجمل والحروف ..ونسيت اسمي ..
وفجأة .. وأنا قاعد لوحدي .. فجأة يعني .. فجأة كده .. فجأة ها!!!
لقيت حد حط إيده على كتفي .. وقالي بصوت تخين .. تخين أوي.. زي صوت سونيا صبري في اغنية رجل المستحيل : ارجع يا جمعاوي .. ارجع!! مصر محتاجك!!
بصيت .. لقيته الواد كريم العيسوي محرر باب نبض الجامعة .. فقولتله: بجد يا كريم مصر محتجاني؟!
قالي: لأ يا خويا .. ده أمك بعتاني وبتقولك الحيطة نشفت .. تعالى لو عايز تخبط دماغك فيها..
وبعدين أنا مش جاي عشان موضوع أمك ده .. أنا جاي عشان المحررين في الموقع قالوا إن أنت نفسيتك تعبانة .. ودماغك بقيت فاضية .. وأفكارك خلصت.. فاتفقنا نطلع كام يوم مصيف قبل ما الكلية تبدأ .. ها قولت إيه؟؟
جمعاوي: ماشي يا عم أي حاجة .. أهو ألاقي صرفة في نفسي؟؟
كريم: خلاص المعلم بيقولك ..
جمعاوي: معلم .. معلم مين؟؟
كريم : قصدي رئيس التحرير .. المهم .. استنى بكرة المغربية عند موقف مشاريع .. المراغي .. اللي جنب الترعة عند عزبة الزوايدة
جمعاوي: هو في إيه يا عم!! .. هو احنا حنصيف في بوليعة؟!
كريم: لأ يا سيدي ما أنت فاهم إن أمن الدولة بيمسك الطلبة الإخوان في المصايف .. ف احنا قولنا نتخفي عشان نعرف نصيف .. خلاص .. مستنيينك .. صحيح قبل ما أنسى .. ابقى تعالى متنكر ..
جمعاوي: إزاي يعني؟؟ .. ألبس ست مثلاً؟؟
كريم: معرفش بقى .. رئيس التحرير اللي قال كده .. عشان محدش يهرشنا.

ساعة الصفر .. من أمام موقف مشاريع عزبة المراغي

رحت في المعاد والمكان المحدد .. لقيت العيال متنكرين بجد .. وقال أنا اللي كنت فاكرهم بيهزروا ..لقيت كريم لابس أفطان واسع مخطط وشايل على راسه صاج كحك .. والواد مروان سعيد لابس بيجامة كاستور ونظارة كبيرة عاملة زي نظارة اللحام .. والواد محسن قال يعني كأنه مش رايح مصيف فلبس في الحر بلوفر ووجاكت جلد..
وجاءت ساعة الصفر .. وبدأنا التحرك .. وكانت نقطة التجمع الأولى عند عربية الكبدة بتاعت عبده تلوث .. وأثناء التظاهر بالأكل مر علينا رئيس التحرير وقال لنا : احنا حنتقسم فريقين .. فريق سيتجه إلى شاطئ البيطاش .. والفريق الثاني سيتجه إلى الهانوفيل .. ثم يظبط كل فرد عوامة .. وحنتقابل كلنا في وسط الميا .. عند حدود ميناء "بين شيفع" و "بيت يم" .. قشطة يا رجالة؟؟
الجميع وهما لسه بياكلوا كبدة: قشطة يا ريس!!
رئيس التحرير: خلاص .. كفاية .. سيبوا الكبدة بقى .. يلا يا رجالة ربنا معاكم..
فسأله الواد خالد عمر: يا ريس هو مفيش كلمة سر .. أو إشارة ببداية العملية؟؟
رئيس التحرير: آه صحيح ..طيب خلاص .. بصوا الإشارة حنشغل
أغنية شعب إسكندرية .. بتاعة الواد حمو عباطة "يا زانقني وجنبك فاضي .. ازنقني كمان أنا راضي"
اتقسمنا فريقين فعلاً .. ناس ركبت أتوبيس وناس ركبت ميكروباص .. وكنت أنا من اللي ركبوا الأتوبيس .. وركبنا جنب بعض .. بس كأن كل واحد لوحده .. ولما جا الكومسري يقطع التذاكر .. بص لنا .. وقالنا: أنتم مع بعض يا كباتن .. قولنا: لأ .. قالنا: شكلكم كأنكم رايحين تعملوا عملية وهذا قائدكم .. - قصده عليا- فقولتله : لأ يا عمو .. أنا حتدفع تذكرة واحدة .. مليش دعوة بيهم..
وصلنا شاطئ البيطاش .. كل واحد مشى لوحده كأننا منعرفش بعض .. غيرنا هدومنا .. وكل واحد ظبط عوامته .. وفجأة ..
الواد كريم العيسوي -فقري الواد ده على فكرة- لقيته بيصرخ: يا لهوي .. ألحقوني يا جماعة .. جريت عليه .. وقولتله: وطّي صوتك .. حتودينا في داهية!! .. قالي: ألحقني يا جمعاوي .. العملية فشلت ..العوامة فست!! .. العوامة فست!!
راح الواد خالد عمر صرخ : لأ .. العملية مش ممكن تفشل .. كريم..احنا حننفخ العوامة عند ميكانيكي ..
جمعاوي : احنا كده حنتوه عن بعض ..
كريم: لو بتحب أمك تعالى ..أنا مبعرفش أعوم .. وربنا حيسترها..ورحنا .. ننفخ العوامة ..
ف خالد دخل للميكانيكي .. وفجأة طلع يصرخ: مش ممكن.. البلف مش عايز يخش في العوامة .. البلف مش عايز يخش في العوامة ..
جمعاوي: حاول تاني معلش..
كريم: لأ سيبوني يا جماعة .. أنا حاحاول ..
جمعاوي: كريم .. كريم .. فاخدته في حضني ..وقولتله: خلي بالك من نفسك مصر محتجاك .. يا كيمو
خالد: -وعنيه مدمعة- تفتكر حننجح؟؟
جمعاوي -وعنيا مدمعة بس مش أوي-: ما فتكرش
وفجأة ..
لقيت اتنين زي الحيطان مسكونا أنا وخالد .. وواحد دخل دكان الميكانيكي مسك كريم ..
نقولهم: أنتم مين؟؟ في إيه ؟؟ احنا عملنا إيه؟؟ ومفيش حد بيرد .. وهما بيجرونا على عربية بوكس واقف قدامها ظابط .. فوقفونا قدامه .. صرخت في وشه .. احنا عملنا إيه؟؟
الظابط: احنا راصدين تحركاتكم كلها .. وصحابكم في الهانوفيل اتمسكوا زيكم..
جمعاوي: احنا كنا عايزين نصيف .. احنا أحرار في بلدنا .. ومش خدامين عندكم .. أنت فاهم
لقيته رزعني قلم على وشي .. وصرخ فيا: أخرس ياااااااا كلب
جمعاوي: طيب .. والله العظيم .. والله العظيم ما حسكت على كلمة.. أخرس دي
الظابط : ماشي ..متزعلش.. يلا يا كلب ..
جمعاوي: أهو كده!!
كريم العيسوي: على فين يا باشا
جمعاوي: يعني حيودينا الحديقة الدولية يا أبو مخ
الظابط: على أمن الدولة .. يا ولاد الـ..........
انتظروا الحلقة القادمة: جمعاوي في أمن الدولة

هههههههههههههههههههههه
واحنا مستنين الحلقة القادمة بس ماتتأخرش علينا

طيب روح خدلك غطس وابقى تعالى ماتتاخرش