حكاية زمن

أبتدي منين الحكاية
و الحكاية… ملهاش بداية و لا نهاية
أبتديها بكان يا مكان
دي حكاية… ملهاش مكان ولا زمان
أولها كان

أول نقطة دم سالت على كف الزمن
وآخرها
أرواح بريئة لسة بتدفع التمن
مدن تقوم.. و مدن في لحظة بتنهدم
والعدل في زماننا نسبي.. طول ما الحقيقة بتتردم
والقلب مات
راح يدور على هدمة تستر عورة السكات
غرق الكلام
في بحر دم سايل على نحر حمامة السلام
ولا حد يسأل حتى روحك تسوى كام
أصل الحمام في زماننا مكسور الجناح
وانكتب عليه يطير… تحت تهديد السلاح
هي دي حكايتنا يا سادة يا كرام
ضاعت شمس الانسانية مننا وسط الغمام
غمام الجهل و الجبن …و أنصاف الرجال
و على اللسان.. يفضل حاير السؤال..
إمتى تنتهي الحكاية
إمتى تنتهي الحكاية