كورة.. انفجار.. وفرحة!
"خرج مئات الآلاف من عشاق الكرة إلى الشوارع في مصر للاحتفال بفوز المنتخب المصري ببطولة كأس أمم إفريقيا للمرة السادسة في تاريخه، والثانية على التوالي، ويقول مراسلنا في العاصمة المصرية إن شوارع القاهرة انفجرت بأصوات الاحتفالات والألعاب النارية لحظة إعلان حكم المباراة نهايتها وفوز الفريق المصري. وتجمع المحتفلون على جسور القاهرة، حيث امتزجت هتافاتهم بمنبهات السفن السياحية، كما توهجت سماء العاصمة بالألعاب النارية، في حين طافت السيارات في الشوارع وهي تطلق منبهاتها احتفالاً". موقع "بي بي سي" العربي
|
***
يمكن ما يكونش ليك في الكورة أوي
بس أكيد ليك في مصر
وعشان كده وارد جداً
إنك تكون واحد من الملايين اللي طافوا شوارع المحروسة بعد انتهاء مباراة الكاميرون الأخيرة..
ويمكن كتير من الناس كانوا فرحانين بالبطولة دي أكتر حتى من البطولة اللي فاتت، واللي فازت بيها مصر –برضه- لما كانت منظمة عندنا..
لأن الكل أجمع على أن أداء مصر في بطولة "غانا" كان أقوى وأفضل وأجمل و"أرجل" كتير من البطولة اللي فاتت، ولأنها فازت بالبطولة دي "عن جد وتعب وعرق"..
لدرجة أن فيه اللي جمد قلبه، وقال بصريح العبارة إن مصر في البطولة الأخيرة ما قدمتش أحسن أداء في الكام سنة اللي فاتوا.. لأ.. دي قدمت أحسن أداء في تاريخها الكروي كله...
وسواء كان ده صحيح أو مبالغ فيه
فالأهم من كل ده
أن المنتخب الوطني فاز بالبطولة؛ لأنه كان..
الأفضل والأحسن تخطيطاً وتدريباً.. والأكثر تفاؤلا والأقل يأساً.. والأكثر ابتعاداً عن الغرور.. والأكثر إيماناً بالله.. والأكثر ثقة في النفس.. والأكثر يقيناً من أن النجاح جاي جاي إن شاء الله.. بس كل واحد يعمل اللي عليه
هيطلع لك هنا واحد من إياهم ويقولك:
"ده فريق محظوظ.."
وده شخص لطيف، هنرد عليه ونقوله:
"القصة مافيهاش أي حظ.. باختصار شديد.. فريق اجتهد ولعب كفرد واحد ففاز.."
دي وجهة نظرنا واللي احنا مقتنعين به أن المنتخب فاز بالبطولة..
لأنه الأفضل
وإن الناس نزلت الشوارع فرحانة؛..
لأنها حست بده